KCSM2026-03-21 04-19pm
(ភ្នំពេញ)៖ កាកសំណល់រាវដែលបង្ហូរចេញពីតាមរោងចក្រសហគ្រាសនានា ជាប្រភពបង្កផលប៉ះពាល់ធ្ងន់ធ្ងរដល់បរិស្ថាន ជីវិតមនុស្ស សត្វ រុក្ខជាតិ និងជីវៈចម្រុះនៅក្នុងទឹក ប្រសិនបើកាកសំណល់រាវទាំងនោះសំអាតមិនបានត្រឹមត្រូវ មិនបានល្អមុនបង្ហូរចូលទៅកាន់ទីសាធារណៈ ឬប្រភពទឹកសាធារណៈ។
ក្នុងយុទ្ធសាស្ត្រវិស័យចក្រាការគ្រប់គ្រងគុណភាពទឹកតាមសមុទ្រ ទន្លេ ស្ទឹង បឹងបួរ គឺជាកិច្ចការអាទិភាពមួយរបស់ក្រសួងបរិស្ថានដឹកនាំដោយលោក អ៊ាង សុផល្លែត ជារដ្ឋមន្ត្រី។ នៅក្នុងឆ្នាំ២០២៥កន្លងទៅនេះ ក្រសួងបរិស្ថាន បានទប់ស្កាត់កាកសំណល់រាវរង្វង់ជិត ២០លានម៉ែត្រគូបនៅតាមរោងចក្រ សហគ្រាសនានាមិនឱ្យហូរទៅកាន់សាធារណៈ ឬប្រភពទឹកធម្មជាតិ។
លោក ជូ មុនីដារិន អគ្គនាយករងនៃអគ្គនាយកដ្ឋានគាំពារបរិស្ថាន នៃក្រសួងបរិស្ថាន បានគូសបញ្ជាក់ថា កាកសំណល់រាវបង្កផលប៉ះពាល់ធ្ងន់ធ្ងរដល់បរិស្ថាន ជីវិតមនុស្ស សត្វ រុក្ខជាតិ និងជីវៈចម្រុះនៅក្នុងទឹក ប្រសិនបើកាកសំណល់រាវត្រូវបានបង្ហូរចូលប្រភពទឹកធម្មជាតិ មិនបានឆ្លងកាត់ការសំអាតឱ្យបានត្រឹមត្រូវទេនោះ។
ផ្អែកតាមក្រមបរិស្ថាន និងធនធានធម្មជាតិ ម្ចាស់រោងចក្រសហគ្រាសទាំងឡាយនៅកម្ពុជា មានកាតព្វកិច្ចអនុវត្តន៍នូវវិធានបច្ចេកទេសនានា លើការគ្រប់គ្រងកាកសំណល់ឱ្យបានស្អាតល្អមុននឹងបង្ហូរចេញទៅក្រៅរោងចក្រ ដូចជាការសាងសង់អាងប្រព្រឹត្តកម្មទឹកកខ្វក់ជាដើម។
បើទោះបីជាក្រសួងបរិស្ថាន បានប្រឹងប្រែងផ្សព្វផ្សាយ និងចាត់វិធានការច្បាប់នានាយ៉ាងណាក្តី នៅពេលបច្ចុប្បន្ននេះ គេក៏នៅមើលឃើញថា មានរោងចក្រ សហគ្រាសជាច្រើនមិនអនុវត្តន៍នូវកាតព្វកិច្ចរបស់ខ្លួនឱ្យបានល្អទៅតាមវិធានទាំងឡាយដែលបានកំណត់នៅក្នុងក្រមបរិស្ថាន និងធនធានធម្មជាតិនៅឡើយនោះទេ។
លោក ជូ មុនីដារិន បានអំពាវនាវដល់ម្ចាស់រោងចក្រ សហគ្រាសទាំងឡាយនៅកម្ពុជា តម្កើងស្មារតីចូលរួមអនុវត្តន៍នូវវិធានទាំងឡាយពាក់ព័ន្ធការគ្រប់គ្រងកាកសំណល់រាវ ដើម្បីលើកកម្ពស់បរិស្ថាននៅកម្ពុជា ។
