ប្រព័ន្ធផ្សព្វផ្សាយរដ្ឋអុីរ៉ង់ ដាក់ចេញលក្ខខណ្ឌចម្បងចំនួន៥ឱ្យអាមេរិក បើចង់បញ្ចប់សង្រ្គាម

KCSM2026-03-26 08-03pm

(តេហេរ៉ង់)៖ បន្ទាប់ពីសហរដ្ឋអាមេរិក បានបញ្ជូនផែនការរបស់ខ្លួនសំដៅបញ្ចប់សង្រ្គាមនៅមជ្ឈិមបូព៌ាឱ្យទីក្រុងតេហេរ៉ង់ ប្រព័ន្ធផ្សព្វផ្សាយរដ្ឋអ៉ីរ៉ង់ ដោយផ្អែកលើប្រភពពីមន្រ្តីសន្តិសុខនយោបាយជាន់ខ្ពស់មួយរូប ដែលមិនបញ្ចេញអត្តសញ្ញាណ បានរាយការណ៍ថា ដំណោះស្រាយណាមួយសម្រាប់ជម្លោះនេះ គឺនឹងអាស្រ័យទាំងស្រុង លើលក្ខខណ្ឌក៏ដូចជាពេលវេលាកំណត់​របស់អ៉ីរ៉ង់ផ្ទាល់។ 

ប្រព័ន្ធផ្សព្វផ្សាយរដ្ឋអ៉ីរ៉ង់ Press TV បាននិយាយថា អ៉ីរ៉ង់នឹងមិនអនុញ្ញាត1ឱ្យប្រធានាធិបតីអាមេរិក លោក ដូណាល់ ត្រាំ ធ្វើជាអ្នកដឹកមុខនៃទិសដៅស្ថានការណ៍ឡើយ ហើយបានសង្កត់ធ្ងន់ថា ប្រតិបត្តិកាវាយប្រហារការពារខ្លួនរបស់អ៉ីរ៉ង់ នឹងបន្តរហូតទាល់តែការទាមទាររបស់ខ្លួន ត្រូវបានទទួលយក។ បើតាម Press TV ទីក្រុងតេហេរ៉ង់ បានដាក់ចេញលក្ខខណ្ឌចម្បង​ចំនួន៥ បើចង់ឱ្យមានកិច្ចព្រមព្រៀងឈប់បាញ់។

លក្ខខណ្ឌទាំង៥នោះ រួមមាន៖ ១. បញ្ឈប់ទាំងស្រុងនូវការឈ្លានពាននិងការធ្វើឃាតរបស់សត្រូវ។ ២. បង្កើតយន្តការរឹងមាំ ដើម្បីធានាថា អ៉ីរ៉ង់នឹងមិនរងការបង្កសង្រ្គាមតទៅទៀត នាពេលអនាគត។ ៣. ធានានិងកំណត់ច្បាស់លាស់ អំពីសំណងចំពោះ​ការខូចខាតដែលបង្កឡើងដោយសង្រ្គាម សម្រាប់ប្រទេសអ៉ីរ៉ង់។ ៤. បិទបញ្ចប់សង្រ្គាមនៅគ្រប់សមរភូមិ និងជាមួយ​ចលនាប្រដាប់អាវុធទាំងអស់ដែលជាប់ពាក់ព័ន្ធ នៅទូទាំងតំបន់។ ៥. ទទួលស្គាល់និងធានាជាអន្តរជាតិ ចំពោះអធិបតេយ្យរបស់អ៉ីរ៉ង់ លើការគ្រប់គ្រងច្រកសមុទ្រ Hormuz។

គួរបញ្ជាក់ថា រដ្ឋមន្ត្រីការបរទេសអ៉ីរ៉ង់ លោក Abbas Araqchi កាលពីថ្ងៃពុធ ទី២៥ ខែមីនា ឆ្នាំ២០២៦ បានទទួលស្គាល់ថា អ៉ីរ៉ង់កំពុងពិនិត្យលើសំណើមួយរបស់សហរដ្ឋអាមេរិក ដើម្បីបិទបញ្ចប់សង្រ្គាម ប៉ុន្តែមិនមានបំណងចរចាបន្ធូរបន្ថយជម្លោះនោះឡើយ៕

ប្រភព:Aljazeera