KCSM2026-03-04 03-38pm
បរទេស ៖ របាយការណ៍ស៊ើបអង្កេតថ្មីមួយបានទម្លាយថា ភ្នាក់ងារចារកម្មអ៊ីស្រាអែល (Mossad) បានសម្រេចជោគជ័យក្នុងការលួចចូលទៅក្នុងបណ្តាញកាមេរ៉ាសុវត្ថិភាព និងកាមេរ៉ាចរាចរណ៍រាប់ពាន់គ្រឿងនៅក្នុងទីក្រុងតេហេរ៉ង់ ប្រទេសអ៊ីរ៉ង់ អស់រយៈពេលជាច្រើនឆ្នាំមកហើយ ដែលជាផ្នែកមួយនៃយុទ្ធសាស្ត្រតាមដាន និងកំណត់គោលដៅមេដឹកនាំកំពូលរបស់ប្រទេសនេះ។
តាមរយៈទិន្នន័យដែលទទួលបាន អ៊ីស្រាអែលបានប្រើប្រាស់បច្ចេកវិទ្យាបញ្ញាសិប្បនិម្មិត (AI) ដើម្បីវិភាគ និងកំណត់អត្តសញ្ញាណយ៉ាងច្បាស់លាស់នូវរាល់សកម្មភាពរបស់ក្រុមអង្គរក្សការពារមេដឹកនាំកំពូលលោក Ayatollah Ali Khamenei រួមមានកាលវិភាគធ្វើដំណើរ ផ្លាកលេខរថយន្ត និងអាសយដ្ឋានផ្ទះសម្បែងរបស់ពួកគេ។ មន្ត្រីចារកម្មអ៊ីស្រាអែលបានអះអាងថា ពួកគេស្គាល់ភូមិសាស្ត្រ និងបំលាស់ទីនៅក្នុងទីក្រុងតេហេរ៉ង់ ច្បាស់ដូចបាតដៃរបស់ពួកគេផ្ទាល់។
មុំកាមេរ៉ាមួយបានបង្ហាញប្រយោជន៍យ៉ាងពិសេស និងអនុញ្ញាតឱ្យភ្នាក់ងារតាមដានកន្លែងដែលអង្គរក្សចតរថយន្តផ្ទាល់ខ្លួនរបស់ពួកគេនៅពេលមកដល់បរិវេណអគាររបស់មេដឹកនាំកំពូលនៅលើផ្លូវ Pasteur នៅចំកណ្តាលបេះដូងនៃទីក្រុងតេហេរ៉ង់។
ការលួចចូលប្រព័ន្ធកុំព្យូទ័រទាំងនេះគឺជាផ្នែកមួយនៃយុទ្ធនាការស៊ើបការណ៍សម្ងាត់រយៈពេលជាច្រើនឆ្នាំ ដែលនៅទីបំផុតនាំឱ្យមានការសម្លាប់លោក Khamenei នៅថ្ងៃសៅរ៍ បន្ទាប់ពីយន្តហោះចម្បាំង ដែលបានធ្វើដំណើរដោយផ្ទាល់ពីមូលដ្ឋានយោធាអ៊ីស្រាអែលអស់រយៈពេលជាច្រើនម៉ោង បានបាញ់គ្រាប់មីស៊ីលជាក់លាក់រហូតដល់ ៣០ គ្រាប់ទៅលើបរិវេណអគាររបស់គាត់។
សាកសពរបស់មេដឹកនាំកំពូលត្រូវបានគេរកឃើញនៅក្នុងគំនរបាក់បែក បន្ទាប់ពីការវាយឆ្មក់ទម្លាក់គ្រាប់បែកនៅពេលថ្ងៃ ដែលមានគោលបំណងផ្តួលរំលំរបបនេះ។
នៅពេលដែលអ៊ីស្រាអែលបានរកឃើញវត្តមានលោក Khamenei នៅព្រឹកថ្ងៃសៅរ៍ ពួកគេបានរំខានដល់ប៉មទូរស័ព្ទចល័តប្រហែលដប់នៅជិតផ្លូវ Pasteur ដែលធ្វើឱ្យទូរស័ព្ទហាក់ដូចជារវល់នៅពេលតេហៅ និងរារាំងអង្គរក្សរបស់គាត់ពីការទទួលបានការព្រមានដែលអាចកើតមាន។
មេដឹកនាំយោធាជាន់ខ្ពស់ពីររូប គឺលោកឧត្តមនាវីឯក Ali Shamkhani និងមេបញ្ជាការ IRGC ឧត្តមសេនីយ៍ Mohammad Pakpour ព្រមទាំងកូនស្រី ចៅ និងកូនប្រសាររបស់លោក Khamenei ក៏ត្រូវបានសម្លាប់នៅក្នុងការវាយប្រហារនៅទីក្រុងតេហេរ៉ង់ផងដែរ។
ភរិយារបស់មេដឹកនាំកំពូលអ៊ីរ៉ង់ គឺលោកស្រី Mansoureh Khojasteh Bagherzadeh អាយុ ៧៩ ឆ្នាំ ក៏ត្រូវបានសម្លាប់ផងដែរ។ អតីតប្រធានាធិបតីអ៊ីរ៉ង់ Mahmoud Ahmadinejad ក៏ស្លាប់ដែរ។
យោងតាមប្រភពព័ត៌មាន ការជ្រៀតចូលតាមរយៈប្រព័ន្ធបច្ចេកវិទ្យានេះ គឺជាកត្តាគន្លឹះដែលនាំទៅដល់ការវាយប្រហារចុងក្រោយបង្អស់របស់អ៊ីស្រាអែល ដែលបានធ្វើឱ្យប៉ះពាល់យ៉ាងធ្ងន់ធ្ងរដល់រចនាសម្ព័ន្ធដឹកនាំកំពូលរបស់អ៊ីរ៉ង់។
បច្ចុប្បន្ន អាជ្ញាធរអ៊ីរ៉ង់កំពុងស្ថិតក្នុងភាពជ្រួលច្របល់ និងព្យាយាមស៊ើបអង្កេតលើការធ្លាយព័ត៌មានសន្តិសុខដ៏ធំសម្បើមនេះ ខណៈដែលពិភពលោកកំពុងតាមដានយ៉ាងយកចិត្តទុកដាក់ចំពោះស្ថានការណ៍តានតឹងនៅមជ្ឈិមបូព៌ា៕(ប្រែសម្រួលដោយ ពិសិដ្ឋ សំណាង)