KCSM2026-05-29 05-34pm
ភ្នំពេញ៖ យោងតាមរបាយការណ៍បច្ចុប្បន្នភាពចុងក្រោយបង្អស់របស់អង្គភាពប្រឆាំងអំពើពុករលួយ (អ.ប.ព. / ACU) ដែលបានផ្សព្វផ្សាយនៅថ្ងៃទី២៨ ខែឧសភា ឆ្នាំ២០២៦ នេះ បានឱ្យដឹងថា សំណុំរឿងអំពើពុករលួយដ៏រង្គោះរង្គើ ពាក់ព័ន្ធនឹងការរត់ការទិញ-លក់មុខតំណែងរដ្ឋបាលសរុបទឹកប្រាក់ ៣០ ម៉ឺនដុល្លារ ត្រូវបានសាលាឧទ្ធរណ៍ចេញសាលដីកាសម្រេចជាផ្លូវការហើយ។
ប្រភពដដែលបានគូសបញ្ជាក់ថា សាលាឧទ្ធរណ៍បានបើកសវនាការជំនុំជម្រះលើសំណុំរឿងរបស់ជនត្រូវចោទទាំង ៤ រូប រួមមាន៖ លោក កន សុខកាយ អតីតអភិបាលស្រុកល្វាឯម, លោក លី សាម៉េត (ហៅគ្រូមា) អតីតអ្នកឧកញា, លោក ដួង តារា អតីតជំនួយការផ្ទាល់សម្តេចតេជោ និងលោក ឡាច សំរោង កាលពីថ្ងៃទី២៩ ខែមេសា ឆ្នាំ២០២៦ កន្លងទៅ។
ក្រោយពីបានពិនិត្យភស្តុតាង និងទាញហេតុផលយ៉ាងល្អិតល្អន់ សាលាឧទ្ធរណ៍បានឈានដល់ការប្រកាសសាលដីកាជាផ្លូវការ កាលពីថ្ងៃទី២៧ ខែឧសភា ឆ្នាំ២០២៦ ម្សិលមិញនេះ។
សូមរំលឹកឡើងវិញថា ជនជាប់ចោទទាំង ៤ រូប ត្រូវបានសមត្ថកិច្ចជំនាញចាប់ខ្លួន និងចោទប្រកាន់ជាផ្លូវការពីបទ៖ «ប៉ុនប៉ងក្នុងបទសូកប៉ាន់» តាមបញ្ញត្តិមាត្រា ២៧ និងមាត្រា ៦០៥ នៃក្រមព្រហ្មទណ្ឌ រួមផ្សំនិងមាត្រា ៣២ នៃច្បាប់ស្តីពីការប្រឆាំងអំពើពុករលួយ។ សំណុំរឿងនេះបានផ្ទុះឡើង ក្រោយពីមានការលាតត្រដាងថា លោក កន សុខកាយ បានប្រគល់ប្រាក់ ចំនួន ៣០ ម៉ឺនដុល្លារអាម៉េរិក ទៅឱ្យក្រុមលោក លី សាម៉េត ដើម្បីរត់ការយកតំណែងជា «អភិបាលក្រុងអរិយក្សត្រ» នៃខេត្តកណ្តាល។
ក្រៅពីការប្រកាសសាលដីកាលើក្រុមកំពូលអ្នករត់ការទាំង ៤ រូបនេះ របាយការណ៍របស់ ACU ក៏បានបង្ហាញពីវឌ្ឍនភាពច្បាប់ទៅលើបក្សពួកម្នាក់ទៀត គឺឈ្មោះ តាំង សុវ័ន្ត ដែលត្រូវបានចោទប្រកាន់ពីបទ៖ «ប៉ុនប៉ងសូកប៉ាន់ និងបរិហារកេរ្តិ៍មកលើមន្ត្រី និងស្ថាប័ន អ.ប.ព.» ផងដែរ។
ការចេញសាលដីការបស់សាលាឧទ្ធរណ៍ នាចុងខែឧសភា ឆ្នាំ២០២៦ នេះ ឆ្លុះបញ្ចាំងយ៉ាងច្បាស់ពីការប្តេជ្ញាចិត្តយ៉ាងម៉ឺងម៉ាត់របស់រាជរដ្ឋាភិបាល ក៏ដូចជាស្ថាប័នប្រឆាំងអំពើពុករលួយ ក្នុងការលុបបំបាត់វប្បធម៌រត់ការទិញតំណែង និងការពង្រឹងប្រព័ន្ធយុត្តិធម៌នៅកម្ពុជា ឱ្យមានភាពស្អាតស្អំ និងតម្លាភាព៕
