លោកប្រធានាធិបតីរុស្សី វ៉្លាឌីមៀ ពូទីន យល់ព្រមបើកកិច្ចចរចាសន្តិភាពត្រីភាគីជាមួយអ៊ុយក្រែន និងអាមេរិកឡើងវិញ នៅក្រោយនេះ

KCSM2026-10-22 03-45pm

(សាំងភីធឺស្ប៊ឺក)៖ វិមានក្រឹមឡាំង បានឱ្យដឹងនៅថ្ងៃពុធនេះថា ប្រធានាធិបតីរុស្ស៊ី លោក វ្ល៉ាឌីមៀ ពូទីន បានយល់ព្រមបើកកិច្ចចរចាសន្តិភាពត្រីភាគីជាមួយអ៊ុយក្រែន ក្រោមការសម្របសម្រួលរបស់សហរដ្ឋអាមេរិកឡើងវិញ នៅដើមខែក្រោយ បន្ទាប់ពីលោក ពូទីន បានជួបពិភាក្សាជាមួយប្រេសិតពិសេសអាមេរិក លោក Steve Witkoff ក្នុងកិច្ចខិតខំប្រឹងប្រែងចុងក្រោយរបស់វ៉ាស៊ីនតោន ដើម្បីបញ្ចប់សង្គ្រាម។ 

វិមានក្រឹមឡាំង បានបញ្ជាក់ថាកិច្ចចរចាសន្តិភាពត្រីភាគីថ្មីនេះ នឹងធ្វើឡើងក្នុងកម្រិតមន្ត្រីបច្ចេកទេស នៅក្នុងរដ្ឋធានីអាប៊ូដាប៊ី (Abu Dhabi) នៃប្រទេសអារ៉ាប់រួម ដោយផ្តោតលើការធានាសន្តិសុខទៅវិញទៅមករវាងអ៊ុយក្រែន និងរុស្ស៊ី នៅពេលសង្គ្រាមត្រូវបានបញ្ចប់។ កិច្ចចរចានេះ អាចនឹងចាប់ផ្តើមនៅថ្ងៃទី១០ ខែវិច្ឆិកា ឬក្រោយកាលបរិច្ឆេទនេះ ខណៈកិច្ចចរចាសន្តិភាពចុងក្រោយបង្អស់ដែលសម្របសម្រួលដោយអាមេរិក ធ្លាប់បានធ្វើឡើងកាលពីខែកុម្ភៈ មុនពេលសង្គ្រាមរវាងអាមេរិក-អ៊ីស្រាអែល និងអ៊ីរ៉ង់បានផ្ទុះឡើង។

ជំនួបផ្ទាល់រយៈពេលជិត ៣ ម៉ោងក្នុងទីក្រុងសាំងភីធឺស្ប៊ឺក បានចាប់ផ្តើមឡើងជាមួយនឹងកាយវិការសុច្ឆន្ទៈពីរុស្ស៊ី តាមរយៈការដោះលែងលោក Stephen Hubbard អតីតគ្រូបង្រៀនជនជាតិអាមេរិកដែលជាប់ឃុំតាំងពីឆ្នាំ២០២២។ យ៉ាងណាក្ដី ទីប្រឹក្សាវិមានក្រឹមឡាំង លោក Yuri Ushakov បានបង្ហើបថា រុស្ស៊ីនៅតែមិនទាន់ពេញចិត្តទាំងស្រុងចំពោះលទ្ធផលនៃកិច្ចពិភាក្សាដែលលោក Witkoff ទើបតែបានធ្វើឡើងកាលពីថ្ងៃអង្គារ នៅទីក្រុងអូស្លូ (Oslo) ជាមួយប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និងតំណាងអង្គការណាតូនោះឡើយ បើទោះបីជាមន្ត្រីអាមេរិកអះអាងថាអ៊ុយក្រែនបានដាក់ចេញគំនិត និងសំណើថ្មីៗក៏ដោយ។

គួរបញ្ជាក់ថា ការយល់ព្រមបើកកិច្ចចរចាឡើងវិញនេះ ធ្វើឡើងចំពេលរដ្ឋាភិបាលក្រុងកៀវ និងសម្ព័ន្ធមិត្តអឺរ៉ុប កំពុងមានការព្រួយបារម្ភកាន់តែខ្លាំងថា សហរដ្ឋអាមេរិកក្រោមការដឹកនាំរបស់លោក ដូណាល់ ត្រាំ កំពុងដកថយពីការគាំទ្រអ៊ុយក្រែន តាមរយៈការពន្យារពេលចែករំលែកព័ត៌មានចារកម្មមីស៊ីល និងការកម្រិតប្រព័ន្ធទូរគមនាគមន៍យោធារបស់ក្រុងកៀវ៕

ប្រភពៈReuters